காரட் அல்வா

கோதுமை அல்வா போல், நாக்கில் ஒட்டுதல், ரப்பர் போன்று இழுபடுதல் என்றெல்லாம் இல்லாமல், கேரட் அல்வா உண்பதற்கு எளிமையானது, சுவையானது. உங்களுக்குத் தெரியுமா? கேரட்கள் ஆரம்ப காலங்களில், வெளிர் மஞ்சள் மற்றும் ஊதா நிறங்களில்தான் இருந்தன. 17ஆம் நூற்றாண்டில், நெதர்லாந்தில்தான் முதன்முதலில் இப்போது இருப்பது போன்ற ஆரஞ்சு வண்ண காரட்கள் பயிரிடப்பட்டன.

தேவையானவை

காரட் - 1/4 கிலோ
சீனி - 1/4 கிலோ
பால் - கால் லிட்டர்
டால்டா - 100 கிராம்
ஏலக்காய் - 4
கிராம்பு - 4
முந்திரிப்பருப்பு - 15

செய்முறை

• முதலில் காரட்டை கழுவி நன்கு சுத்தம் செய்து, துருவியில் துருவிக் கொள்ளவும்.
• அடிகனமான பாத்திரத்தில் ஒரு கோப்பை பாலில் காரட் துருவலை போட்டு, மிதமான தீயில் 10 நிமிடம் வேகவிடவும்.
• பால் சுண்டி வருகையில் சீனியைப் போட்டு கிளறி விடவும். அடுப்பை சிறிதாக எரியவிட்டு, தொடர்ந்து விடாமல் கிளறிக் கொண்டே இருக்கவும்.
• அல்வா பதத்தில் வரும்போது டால்டாவை ஊற்றவும். ஏலக்காய், கிராம்பை பொடி செய்து போடவும்.
• அல்வா நன்றாக திரண்டு வந்த பின் நெய் அல்லது டால்டா தடவிய தட்டில் கொட்டி, மேலே வறுத்த முந்திரிப்பருப்பை பரப்பவும்.

கால அளவு: 30 நிமிடங்கள்
வழங்கியவர்: செல்வி. நிரஞ்சனா, பவானி.