கீரை வடை

கீரை வடை சுவையானது மட்டுமல்ல, ஆரோக்கியமானதும் கூட. பலவகைக் கீரைகளைக் கொண்டு இந்த வடையினைச் செய்யலாம் என்றாலும், அரைக்கீரை பொதுவில் அதிகம் பயன்படுத்தப்படுகின்றது. மேலும் சுவையான பலவகை வடைகளின் குறிப்புகளை அறுசுவை இணையத்தளத்தில் காணலாம்.

தேவையானவை

அரைக்கீரை - ஒரு கட்டு
கொத்தமல்லித்தழை - ஒரு கட்டு
உளுத்தம்பருப்பு - ஒரு கப்
கடலைப்பருப்பு - 4 தேக்கரண்டி
பச்சைமிளகாய் - 6
முந்திரிப்பருப்பு - 50 கிராம்
உப்பு - 2 தேக்கரண்டி
எண்ணெய் - தேவைக்கேற்ப

செய்முறை

• உளுத்தம் பருப்பு, கடலைப்பருப்பு இரண்டையும் சில மணிநேரம் ஊறவைக்கவும்.
• உளுத்தம்பருப்பு, கடலைப்பருப்பு, பச்சைமிளகாய், உப்பு ஆகியவற்றை சேர்த்து, தண்ணீர் விடாமல், நன்கு மையாக அரைத்துக் கொள்ளவும்.
• அரைக்கீரை, கொத்தமல்லித்தழை இரண்டையும் நன்கு கழுவி, பொடிப்பொடியாக நறுக்கி அரைத்து வைத்துள்ள மாவில் போடவும்.
• முந்திரிப்பருப்பையும் சிறுசிறுத் துண்டுகளாக நறுக்கி மாவுடன் சேர்த்துப் பிசைந்து கொள்ளவும்.
• வாணலியை அடுப்பில் வைத்து எண்ணெய் அல்லது நெய் விட்டு காய்ந்ததும் மாவினை வடைகளாகத் தட்டிப் போட்டு வேக வைத்து எடுக்கவும்.