ஓலை கொழுக்கட்டை

திருநெல்வேலி பக்கத்து கொழுக்கட்டை வகை. பொதுவாய் கருப்பட்டிக் கொண்டு செய்யப்படுவது. தற்போது கருப்பட்டிக்கு பதிலாக சீனியையும் பயன்படுத்துகின்றனர்.

தேவையானவை

பச்சரிசி மாவு - 500 மி.லி
கருப்பட்டி - 300 கிராம்
தேங்காய் - ஒரு மூடி
ஏலப்பொடி - அரைத் தேக்கரண்டி
குருத்து பனைஓலை - தேவைகேற்ப


செய்முறை

• தேங்காயைத் துருவி எடுத்துக் கொள்ளவும். கருப்பட்டியில் சிறிது தண்ணீர் விட்டு காய்த்து வடிகட்டி ஆறவைக்கவும்.
• கருப்பட்டிக்கு பதிலாக சீனியையும் பயன்படுத்தலாம்.
• பச்சரிசி மாவுடன் ஏலப்பொடி, தேங்காய்த்துருவல், கருப்பட்டி நீர் சேர்த்து தேவையான அளவு தண்ணீரும் சேர்த்து மாவு பிசைந்து கொள்ளவும்.
• மாவு மிகவும் கெட்டியாக இல்லாமல் சிறிது குழைவாக உள்ளவாறு நீர் விட்டுப் பிசைந்து கொள்ளவும்.
• குருத்து பனை ஓலைகளை ஒரு அடி நீளத்திற்கு அகன்ற அடிப்பாகத்தில் வெட்டி, ஏடு மாதிரி இரட்டையாக திறப்பது போல் தயார் செய்து வைக்கவும்.
• ஒரு ஓலையை விரித்து நடுவில் மாவு வைத்து மற்றொரு ஓலைக் கொண்டு அதனை மூடும்படி பொருத்தி, ஒரு நார் அல்லது நூல் கொண்டு கட்டி வைக்கவும்.
• இதேபோல் மீதமுள்ள மாவு அனைத்துக்கும் தயார் செய்து இட்லி தட்டில் வைத்து நன்றாக வேகவிடவும்.
• வெந்தபின்பு ஓலையைப் பிரித்து எடுத்து கொழுக்கட்டையை சாப்பிட மிகவும் ருசியாய் இருக்கும்.