ஆலு சப்பாத்தி

இந்த தோசை, சப்பாத்தியில வெரைட்டிஸ் கொடுக்கறது ரொம்ப ஈஸி. நமக்கு பிடிச்சத எல்லாம் சேர்த்து செஞ்சுட்டு, அப்புறம் நாம சேர்த்தப் பொருளோட பேரை முன்னாடி சேர்த்துக்க வேண்டியதுதான். உதாரணமா, நெய் ஊத்தி செஞ்சா அது நெய் தோசை, பொடி போட்டு செஞ்சா பொடி தோசை, தக்காளிப் போட்டா தக்காளி தோசை.. வெங்காயம் போட்டா வெங்காய தோசை. இவ்வளவு ஏன், தோசை சரியா வேகாம எடுத்துட்டா, இதுதான் 'மாவு தோசை' ன்னு சொல்லிக்கூட சமாளிச்சுக்கலாம்.

அந்த வகையில இது ஆலு சப்பாத்தி.. ஆலுன்னா உருளைக்கிழங்கு, இப்ப புரிஞ்சு இருக்குமே.. நான் எங்கே வர்றேன்கிறது.

தேவையான பொருட்கள்
கோதுமைமாவு - அரை கிலோ
உருளைக்கிழங்கு - கால் கிலோ
மல்லித் தழை - ஒரு கட்டு
சின்ன வெங்காயம் - நறுக்கியது ஒரு கப்
உப்பு - தேவையான அளவு
எண்ணெய் - 2 அல்லது 3 மேசைக்கரண்டி
மிளகாய் தூள் - ஒரு தேக்கரண்டி

செய்முறை

• கோதுமை மாவில் ஒரு தேக்கரண்டி உப்புத் தூள் போட்டு எண்ணெய் சூடாக்கி மாவில் ஊற்றி சப்பாத்திக்கு மாவு பிசைந்து மூடிவைக்கவும்.
• உருளைக்கிழங்கை வேக வைத்து நன்கு மசித்து அத்துடன் நறுக்கிய வெங்காயம். மல்லித் தழை (சிறியதாக நறுக்கவும்) ஒரு தேக்கரண்டி தனி மிளகாய் தூள் வைத்துக் கொள்ளவும்.
• கோதுமை மாவு பெரிய எலுமிச்சை அளவு எடுத்து சப்பாத்தித் தேய்த்துக் கொள்ளவும்.
• நடுவில் உருளைக்கிழங்கு உருண்டைகளை வைத்து நன்கு மூடிவிடவும்.
• திரும்பவும் அதை சப்பாத்தி போல் தேய்த்து தோசைக்கல்லில் போட்டு நெய் அல்லது எண்ணெய் ஊற்றி இரு புறமும் வெந்த பிறகு எடுக்கவும்.
• புதினா, மிளகாய் வற்றல், உப்பு, புளி வைத்து(வதக்காமல்) அரைத்த பொதினா துவையல் இதற்கு தொட்டு கொள்ள சுவையாக இருக்கும்.