பலாப்பழ கட்லெட்

பலாப்பழ சீசன் ஆரம்பமாயிடுச்சு. வெறும் சுளையாவே எத்தனை நாளைக்குத்தான் சாப்பிடுறது. கொஞ்சம் வித்தியாசமா இந்த மாதிரி கட்லெட்டா செஞ்சு சாப்பிட்டுப் பாருங்க. அப்புறம் எப்படி இருக்குன்னு சொல்லுங்க. உபயம்: திருமதி. என். ரேவதி, நாகப்பட்டினம்.

தேவையானப் பொருட்கள்

பலாப்பழச் சுளைகள் - 20
சர்க்கரைவள்ளிக்கிழங்கு - 4
சர்க்கரை - 100 கிராம்
பிரட் - 5 துண்டுகள்
பிரட் தூள் - ஒரு கப்
பால் - ஒரு டம்ளர்
ஏலக்காய்த்தூள் - ஒரு தேக்கரண்டி
நெய் - ஒரு மேசைக்கரண்டி

செய்முறை

• சர்க்கரைவள்ளிக்கிழங்கை வேகவைத்து தோல், நார் நீக்கி நன்றாக உதிர்க்கவும்.
• பிரட்டை பாலில் ஊறவைத்து நன்றாக பிசைந்து வைத்துக் கொள்ளவும்.
• பலாச்சுளைகளை நறுக்கி போட்டு மிக்ஸியில் நன்கு அரைக்கவும்.
• சர்க்கரையைப் பாகு காய்ச்சி அதில் உதிர்த்த சர்க்கரை வள்ளிக்கிழங்கு, பிசைந்த பிரட்டு, ஏலக்காய் தூள், பலாப்பழக்கூழ் சேர்த்து 10 நிமிடம் கிளறவும்.
• அந்த கலவையை நன்றாகப் பிசைந்து வடை போல் தட்டி, பிரட்டு தூளில் அதைப்புரட்டி நெய் தடவி தோசைக்கல்லில் பரப்பவும்.
• வெந்தவுடன் திருப்பிப்போட்டு பொன்னிறமானதும் எடுத்து விடவும்.
• இது ஒரு இனிப்பான கட்லட்.