போட்டி தினத்திற்கு 10 நாட்களுக்கு முன்பில் இருந்தே நாகை நகரமும் அதன் சுற்றுபுற கிராமங்களும் சற்று பரபரப்பாய்தான் இருந்தன. நாங்கள் எதிர்பார்த்ததைவிட அதிக எண்ணிக்கையில் பெண்கள் கலந்து கொள்ள ஆர்வம் காட்டினர். முதல் கட்டமாக, வந்து குவிந்த நானூற்றுக்கும் அதிகமான சமையல் குறிப்புகளில் இருந்து 100 குறிப்புகளை உமா ஹோட்டல்ஸ் அதிபர் உயர்திரு P.N. குப்புசாமி அவர்கள் தலைமையில் சமையல் கலை வல்லுனர்கள் அடங்கிய நடுவர் குழு தேர்ந்தெடுத்தது. அசைவம், இனிப்பு, காரம், சிற்றுண்டி.. என உணவுகள் 10 பிரிவுகளாகப் பிரிக்கப்பட்டு, ஒவ்வொரு பிரிவிற்கும் 10 பேர் தேர்வு செய்யப்பட்டனர். இவர்களுக்கான இறுதிச் சுற்று 27 ஆம் தேதி, ஞாயிற்றுக்கிழமை மாலை 3 மணியளவில் நாகை D.B.G. திருமண மண்டபத்தில் நடைபெற்றது.