அறுசுவை அறிமுகம்

இணையத்தில் சமையல் குறிப்புகள் என்றால் ஆங்கிலத்தில் மட்டுமே கிடைக்கும் என்ற நிலை 2004 ஆம் ஆண்டு வரை இருந்து வந்தது. ஒரு சில தமிழ் பத்திரிக்கை தளங்களில் சமையல் குறிப்புகள் அவ்வபோது வெளியாகி கொண்டிருந்தாலும், சமையலுக்கென தமிழில் தனியே ஒரு தளம் இல்லை என்பது பெரும் குறையாக இருந்தது. இந்த குறையினை நிவர்த்தி செய்யும் விதமாக, 2004 ஆம் ஆண்டு நவம்பர் மாதம், முற்றிலும் சமையல் குறித்த தகவல்களுக்கான முதல் தளமாக அறுசுவை தொடங்கப்பட்டது. யூனிக்கோடு எழுத்துருக்களின் பயன்பாடு அப்போதுதான் தொடங்கி இருந்தது என்பதால், நிறைய பயனீட்டாளர்களுக்கு யூனிக்கோடு தமிழ் எழுத்துக்களை பார்வையிடுவதில் சிரமங்கள் இருந்தன. இருப்பினும் யூனிக்கோடுதான் எதிர்காலம் என்பதை கருத்தில் கொண்டு, அறுசுவை தளம் முற்றிலும் யூனிக்கோடு எழுத்துருவைக் கொண்டே வடிவமைக்கப்பட்டது.

நாளடைவில் யூனிக்கோடு பயன்பாடு அதிகரிக்கத் தொடங்கியதும், அறுசுவைக்கு வரும் வருகையாளர்களின் எண்ணிக்கையும் அதிகரித்தது. ஒரே வருடத்தில் அறுசுவை தளம் உலகெங்கும் இருக்கும் ஏராளமான தமிழர்களின் பெரும் ஆதரவைப் பெற்று, அவர்கள் தொடர்ந்து வருகைத் தரும் தளமாக மாறியது. வருகையாளர்கள் பலர் தங்களின் குறிப்புகளை அறுசுவையில் வெளியிட விருப்பம் தெரிவித்த போது, அதற்கு வாய்ப்புகள் கொடுக்கும் விதமாக பழைய தளத்தினை மாற்றியமைக்க வேண்டியது அவசியம் ஆயிற்று. பழைய அறுசுவை தளம், நிறைய வசதிகளுடன் புதிய தளமாக 2006 ஆம் ஆண்டு தமிழ் புத்தாண்டு (ஏப்ரல் 14) அன்று வெளிவந்தது.

எதிர்பார்ப்பிற்கும் அதிகமான வரவேற்பு, புதிய தளம் வெளியான சில நாட்களிலேயே கிடைத்தது. அறுசுவையில் குறிப்புகள் கொடுக்க ஏராளமான நேயர்கள் ஆர்வம் தெரிவித்தனர். அவர்களுக்கென கூட்டாஞ்சோறு பகுதி தொடங்கப்பட்டது. அதன்மூலம் அறுசுவைக்கு ஏராளமான குறிப்புகள் கிடைத்தன. வெறும் குறிப்புகள் என்றில்லாமல், சமையலின் செய்முறையை படங்களுடன் விளக்கும் புதிய பகுதியாக யாரும் சமைக்கலாம் அறிமுகப்படுத்தப்பட்டது. ஆங்கில மொழியில் இருந்த இந்திய சமையல் தளங்களில் கூட, அப்போது ஸ்டெப் பை ஸ்டெப் உடன் குறிப்புகள் வெளியாகவில்லை. இந்திய சமையல் தளங்களில் அறுசுவையில்தான் முதல் முறையாக ஸ்டெப் பை ஸ்டெப் படங்களுடன் குறிப்புகள் வெளியாயிற்று. அறுசுவையின் வளர்ச்சிக்கு இந்த பகுதிதான் முக்கிய காரணம் என்பது மறுக்கமுடியாத உண்மை.

2006ல் இருந்து 2010 வரையிலான இந்த நான்காண்டு காலத்தில் அறுசுவை வடிவமைப்பில் பெரிதும் மாற்றங்கள் இருக்கவில்லை. அறுசுவையை முற்றிலும் மாற்றியமைக்க திட்டமிட்டு அதற்கான பணிகளை சில காலத்திற்கு முன்பே தொடங்கி இருந்தாலும், பல்வேறு காரணங்களால், குறிப்பிட்ட நேரத்திற்குள் அதனை முடிக்க இயலவில்லை. சரியாக நான்கு ஆண்டுகளுக்கு பிறகு, மீண்டும் ஒரு தமிழ் புத்தாண்டு தினத்தில் அறுசுவை தளம் மாற்றியமைக்கப்பட்டு வெளியாகின்றது. அறுசுவை நேயர்களின் தேவைகளை கருத்தில் கொண்டு இந்த தளம் வடிவமைக்கப்பட்டிருக்கின்றது. ஏராளமான புதிய பகுதிகள் சேர்க்கப்பட்டுள்ளன. இன்னும் நிறைய பகுதிகள் சேர்க்கப்படவுள்ளன.

ஆறாம் ஆண்டில் வெற்றிகரமாக நடை போட்டு வரும் இந்த வேளையில், தமிழ் மக்கள் என்ற எல்லையைக் கடந்து, உலக மக்கள் அனைவரிடமும் அறுசுவையை எடுத்துச் செல்லும் முயற்சியாய், அறுசுவை தளம் ஆங்கிலத்திலும் மொழிபெயர்க்கப்பட்டு வெளியிடப்பட்டுள்ளது. மொழிப்பெயர்ப்பு பணிகள் தொடர்ந்து நடந்து வருகின்றன. அறுசுவை என்ற அழகிய தமிழ் வார்த்தை, மற்ற மொழியினராலும் மறக்க முடியாத வார்த்தையாக மாற வேண்டும் என்பதை மனதில் வைத்து, அறுசுவை ஆங்கில தளத்தை சிறப்பாய் கொண்டு வரும் முயற்சியில் இறங்கியுள்ளோம். உங்கள் அனைவரின் ஆதரவுடன் இதிலும் வெற்றி காண்போம் என்ற நம்பிக்கை உள்ளது.

அறுசுவை நிர்வாகம்

Forth Vision Media PVT LTD என்ற நிறுவனத்தின் அங்கமாக அறுசுவை தளம் இயங்கி வருகின்றது. சென்னை தியாகராய நகரில் இருந்த அலுவலகம் தற்போது நாகப்பட்டினத்திற்கு மாற்றப்பட்டுள்ளது. அறுசுவையை அடுத்த கட்டத்திற்கு எடுத்து செல்லும் எங்களது முயற்சியில் உதவிட நிறுவன முதலீட்டாளர்கள் (venture capitalists) சிலர் உள்வருகின்ற காரணங்களால், நிறுவன அமைப்பில் நிறைய மாறுதல்கள் இருக்கும். இதே நிறுவனப் பெயரில், அல்லது புதிய பெயரில், வெகு விரைவில் சென்னையில் மீண்டும் அலுவலகம் திறக்கப்படும். அறுசுவை நிர்வாக உறுப்பினர்கள், பணியாற்றும் குழு சம்பந்தமான தகவல்கள், நிர்வாக மாற்றத்திற்கு பிறகு இங்கே தெரிவிக்கப்படும்.

அலைபேசியில் தொடர்பு கொள்ள : +91-9952528028