வழங்கியவர்: திருமதி. காயத்ரி

தேதி: June 21, 2006

பரிமாறும் அளவு:

ஆயத்த நேரம்: 10 நிமிடங்கள்

சமைக்கும் நேரம்: 30 நிமிடங்கள்

மொத்த நேரம்: 40 நிமிடங்கள்

வடநாட்டிலோ, வெளிநாட்டிலோ வெகுநாட்கள் இருந்துவிட்டு வீடு திரும்புகின்றவர்கள் மறக்காமல் கேட்பது இந்த புளிக்குழம்பினைத்தான். அதிகம் பழக்கம் இல்லாத புதுவகை உணவுகளைச் சாப்பிடும் போது நாவின் சுவை மொட்டுக்கள் சற்று மரத்துப் போய்விடுகின்றன. இதனைத்தான் நாக்கு செத்துப் போயிற்று என்கின்றோம். செத்துப் போன நாக்கிற்கு உயிரூட்டும் தன்மை இந்த புளிக்குழம்பிற்கு நிறைய உண்டு.

அறுசுவை தளத்தில் வாசகர்கள் அதிகம் தேடும் குறிப்புகளில் இந்த புளிக்குழம்பும் ஒன்று. செய்வது எளிமையானதுதான். வெறும் குறிப்பை மட்டும் படித்து செய்யும்போது நிறைய சந்தேகங்கள் வரும். உதாரணமாக, புளியைக் கரைத்து எடுத்துக்கொள்ளவும் என்று இருக்கும். எவ்வளவு புளியை எவ்வளவு தண்ணீரில் கரைத்து எடுத்துக்கொள்ள வேண்டும் என்ற தகவல் சரியாக இருக்காது. புதிதாய் சமைப்பவர்கள் தண்ணீர் அளவு தெரியாமல் அதிகமாகவோ குறைவாகவோ கரைத்து விடுவார்கள். குழம்பின் ருசிக்கு புளி கரைக்கும் அளவு மிக முக்கியம். இதில் மாற்றங்கள் இருந்தால் ருசியிலும் மாற்றம் இருக்கும்.

வெண்டைக்காய் - 4
முருங்கைக்காய் - 1
தக்காளி - 2
தேங்காய் - அரை மூடி (சிறியது)
புளி - எலுமிச்சை அளவு
வடகம் - ஒரு தேக்கரண்டி
பூண்டு - 10
பெரிய வெங்காயம் - 2 (நடுத்தர அளவில்)
மிளகாய்த் தூள் - ஒரு மேசைக்கரண்டி
மல்லித்தூள் - அரை மேசைக்கரண்டி
கறிவேப்பிலை - இரண்டு கொத்து
கல் உப்பு - அரை மேசைக்கரண்டி

வடகம் வீட்டிலேயே தயாரித்துக் கொள்ளலாம். இல்லையெனில் கடைகளில் கிடைப்பதை வாங்கிப் பயன்படுத்தலாம். முருங்கைக்காய், வெண்டைக்காய்களை நறுக்கிக் கொள்ளவும்.

வெங்காயத்தையும், பூண்டையும் அம்மியில் வைத்து தட்டி எடுத்துக் கொள்ளவும்.

புளியை தண்ணீரில் சற்று நேரம் ஊற வைத்து, பிறகு கரைத்து சுமார் ஒன்றரை கப் அளவிற்கு திக்கான கரைசலாக எடுத்து வைக்கவும்.

அரை மூடி தேங்காயைத் துருவி அல்லது துண்டுகளாக நறுக்கி எடுத்து, அதனுடன் தக்காளியையும் சேர்த்து மிக்ஸியில் இட்டு அரைத்து எடுத்துக் கொள்ளவும்.

வாணலியில் ஒரு மேசைக்கரண்டி எண்ணெய் ஊற்றி காய்ந்ததும் கறிவேப்பிலை, வடகம் போட்டு, அத்துடன் தட்டி வைத்துள்ள பூண்டு, வெங்காயத்தையும் சேர்த்து 20 விநாடிகள் வதக்கவும்.

புளிக்கரைசலில் அரைத்து வைத்துள்ள தக்காளி, தேங்காய் கலவையை ஊற்றி கரைத்து வாணலியில் ஊற்றவும். அதில் மிளகாய்த்தூள், தனியாத்தூள் சேர்க்கவும். இதனை சுமார் மூன்று நிமிடங்கள் கொதிக்கவிடவும். மூன்று நிமிடங்கள் கழித்து, நன்கு கொதித்து குழம்பு போல் வந்தவுடன் நறுக்கி வைத்துள்ள காய்களையும், உப்பையும் சேர்த்து, வாணலியை மூடி வைத்து வேகவிடவும்.

குழம்பு மேலும் நன்கு கொதித்து, சற்று சுண்டி வந்தவுடன் இறக்கவும். மேலே உள்ள படத்தையும், இங்கே உள்ள படத்தையும் பார்த்தீர்கள் என்றால் குழம்பு சுண்டி வந்திருக்கின்ற வித்தியாசம் தெரியும்.

இப்போது சுவையான புளிக்குழம்பு தயார். புளிக்குழம்பினை பலவகையில் செய்யலாம். இது வெண்டைக்காய், முருங்கைக்காய் சேர்த்து செய்யப்படும் புளிக்குழம்பு. வேறு வகையில் செய்யப்படும் புளிக்குழம்பினை சிறிது நாட்கள் கழித்துப் பார்க்கலாம்.

வடகம் அல்லது கருவடாம் செய்முறை ஒரு கிலோ வெங்காயம் 100 கிராம் பூண்டு 10 கொத்து கறிவேப்பிலை 200 கிராம் உளுத்தம் பருப்பு 50 கிராம் கடுகு 50 கிராம் வெந்தயம் 50 கிராம் சீரகம் ஒரு தேக்கரண்டி மஞ்சள் தூள் இரண்டு மேசைக்கரண்டி உப்பு இரண்டு மேசைக்கரண்டி விளக்கெண்ணெய் வெங்காயம், கறிவேப்பிலை, பூண்டு ஆகியவற்றைப் பொடியாக நறுக்கிக் கொள்ளவும். வெங்காயம், மஞ்சள், உப்பு மூன்றையும் ஒன்றாய் சேர்த்து பிசைந்து 2 நாட்கள் ஊற வைக்கவும். உளுந்தை சுமார் 5 நிமிடங்கள் ஊற வைத்து, அம்மியில் வைத்து ஒன்றிரண்டாக நசுக்கிக் கொள்ளவும். மாவாக அரைத்துவிடக் கூடாது. அரைத்த உளுந்து, வெங்காயக் கலவை மற்றும் அனைத்துப் பொருட்களையும் ஒன்றாய் சேர்த்து ஒரு மேசைக்கரண்டி விளக்கெண்ணெய் விட்டு பிசைந்து கொள்ளவும். மீதமுள்ள எண்ணெய்யை தொட்டுக் கொண்டு, கலவையை சிறு சிறு உருண்டைகளாகப் பிடித்து, வெயிலில் காயவைக்கவும். சுமார் 10 நாட்கள் காய வைத்து எடுக்க வேண்டும்.

மிகவும் சுவையாக புளிக்குழம்பு செய்யக்கூடிய இல்லத்தரசி திருமதி. காயத்ரி அவர்களின் தயாரிப்பை இங்கே உங்களுக்காக கொடுத்துள்ளோம். பொருட்களின் அளவுகளும் துல்லியமாக அளந்து கொடுக்கப்பட்டுள்ளன. செய்து பார்த்து தங்களது கருத்துக்களைத் தெரிவியுங்கள்.

உறுப்பினரது அண்மைக் குறிப்புகள்

சோளா பூரி - 2

arusuvai_team

வற்றல் குழம்பு

arusuvai_team

பிட்ஸா தோசை

arusuvai_team

மாங்காய் பச்சடி

arusuvai_team

2 இன் 1 பூரி

arusuvai_team

காரட் கீர்

arusuvai_team

இணையான குறிப்புகள்

வெண்டைக்காய் கார குழம்பு

வெண்டைக்காய் மோர் குழம்பு

வெண்டைக்காய் கார குழம்பு

வத்தல் குழம்பு

ஆலு வெண்டை குழம்பு

வெண்டைக்காய் மோர் குழம்பு

வெண்டைக்காய் புளிக்குழம்பு

மோர் குழம்பு

வெண்டைக்காய் புளிக்குழம்பு

Comments

நன்றி

Permalink praveen - June 21, 2006 - 15:29

எனக்கு மிகவும் பிடித்தமான புளிக்குழம்பு குறிப்பினை கொடுத்ததற்கு மிக்க நன்றி. ஆனால் வடகம் என்பது புதிதாக உள்ளது? வடகம் என்பது வறுத்து, உணவிற்கு தொட்டுக் கொண்டு சாப்பிடும் வற்றல் தானே?

வடகம்

Permalink admin - June 21, 2006 - 15:42

வெயிலில் காய வைத்து, நீர் சத்தினை வற்றிப் போக வைத்து எடுக்கும் பொருட்கள் அனைத்தையுமே வற்றல் என்றுதான் சொல்லுவார்கள். அந்த வகையில் வடகம் என்பதும் காயவைத்து எடுப்பதே. இதில் பலவகை உள்ளது. கூழ் வடகம் என்பது காயவைத்து எடுத்து, எண்ணெய்யில் பொரித்து சாப்பிடுவது. இந்த வடகம் குழம்பு போன்றவற்றில் சுவைக்காக சேர்க்கப்படுவது. வடாம், வடவம், கருவடாம் இப்படி பல பெயர் இதற்கு உண்டு.
கருவடாம் செய்முறையை மேலே சேர்த்துள்ளேன்.