கருவாட்டுக் குழம்பு

தேதி: August 16, 2006

பரிமாறும் அளவு:

ஆயத்த நேரம்: 10 நிமிடங்கள்

சமைக்கும் நேரம்: 30 நிமிடங்கள்

மொத்த நேரம்: 40 நிமிடங்கள்

5
Average: 5 (4 votes)

பொதுவாக கருவாட்டுக் குழம்பில் கருவாடுகள் வாசனைக்காகத்தான் சேர்க்கப்படும். மிகச் சிறிய அளவிலான நெத்திலி, சன்னாக்குண்ணி கருவாடுகளை, மீன் போல யாரும் எடுத்துச் சாப்பிடுவது இல்லை. கறிவேப்பிலைப் போல் வாசனைக்கு சேர்த்துக் கொண்டு, சாப்பிடும்போது விலக்கிவிடுவார்கள். கருவாடு சிலருக்குப் பிடிக்காது. சிலர் அதற்காக உயிரையும் கொடுக்கத் தயாராக இருப்பார்கள். கருவாடு பிடிக்காதவர்களையும் சுவை பார்க்கச் செய்யும் அளவிற்கு, சுவையான கருவாட்டுக் குழம்பு செய்முறையை நமக்குத் தருகின்றார், திருமதி. செல்வி செந்தில்.

 

நெத்திலிக் கருவாடு - 30
கத்திரிக்காய் - 2
முருங்கைக்காய் - 2
சின்ன வெங்காயம் - 10
தக்காளி - ஒன்று
பச்சை மிளகாய் - 3
மொச்சைக் கொட்டை - அரை கப்
புளி - பெரிய நெல்லிக்காய் அளவு
மிளகாய் தூள் - 1 1/2 மேசைக்கரண்டி
மல்லி தூள் - 2 மேசைக்கரண்டி
வெந்தயம் - ஒரு தேக்கரண்டி
உப்பு - அரை தேக்கரண்டி
எண்ணெய் - 2 மேசைக்கரண்டி


 

நெத்திலிக் கருவாடு இந்த வகைக் குழம்பிற்கு மிகவும் சுவையாக இருக்கும். சின்ன வெங்காயத்தை இரண்டாக நறுக்கிக் கொள்ளவும். கத்திரிக்காயை நான்கு துண்டுகளாக நறுக்கவும். முருங்கைக்காயை இரண்டு அங்குலத் துண்டுகளாக நறுக்கிக் கொள்ளவும். தக்காளியை நான்கு பாதியாக நறுக்கிக் கொள்ளவும்.
வாணலியில் ஒரு மேசைக்கரண்டி எண்ணெய் ஊற்றி காய்ந்ததும், மொச்சைக் கொட்டையை போட்டு 2 நிமிடம் வறுத்து எடுத்துக் கொள்ளவும்.
புளியில் 3 கப் தண்ணீர் ஊற்றி கரைத்து, பிறகு அதில் மிளகாய் தூள், மல்லி தூள், உப்பு போட்டு கலக்கி வைக்கவும். அதிலேயே இரண்டாக கீறின் பச்சை மிளகாய், நறுக்கின தக்காளி, வறுத்து எடுத்த மொச்சை சேர்க்கவும்.
ஒரு வாணலியில் எண்ணெய் ஊற்றி காய்ந்ததும் வெந்தயம் தாளித்து பின்னர் நறுக்கின சின்ன வெங்காயம் போட்டு வதக்கவும்.
பிறகு அதில் கரைத்து வைத்துள்ள கரைசலை ஊற்றவும்.
அத்துடன் நறுக்கின கத்திரிக்காய், முருங்கைக்காய் துண்டங்களை சேர்க்கவும்.
வாணலியை மூடி வைத்து வேகவிடவும். சுமார் 10 நிமிடங்கள் கொதிக்க விடவும்.
அதன் பின்னர் கொதிக்கும் குழம்பில் கருவாட்டைச் சேர்க்கவும். லேசாக கிளறிவிட்டு வேகவிடவும்.
கருவாடு வெந்து நல்ல மணம் வர ஆரம்பித்தவுடன் இறக்கவும். வாசனை ஊரையே விருந்துக்கு அழைக்கும். சுவையோ மீண்டும் மீண்டும் சாப்பிட தூண்டும்.


உறுப்பினரது அண்மைக் குறிப்புகள்

இணையான குறிப்புகள்


Comments

arusuvai vunave Aarokya vaazhvu
உடனே செய்து விட வேண்டும்

சிரிப்பே சிறந்த மருந்து

arusuvai vunave Aarokya vaazhvu
செய்து சாப்பிட்டு இரண்டு நாட்கள் ஆகி விட்டது. வெப்சைட் திறக்க நேரம் கிடைக்கவில்லை. ஆனால் அந்த சுவை இன்னும் நாக்கிலேயே இருக்கிறது

சிரிப்பே சிறந்த மருந்து