கை சுத்து முறுக்கு

தேதி: September 17, 2006

பரிமாறும் அளவு:

ஆயத்த நேரம்: 10 நிமிடங்கள்

சமைக்கும் நேரம்: 30 நிமிடங்கள்

மொத்த நேரம்: 40 நிமிடங்கள்

5
Average: 4.5 (2 votes)

முறுக்கு வகைகளில், கைகளால் சுற்றி செய்யப்படும் கை முறுக்கின் சுவை விவரிக்க முடியாதது, இவ்வகை முறுக்கினை சுற்றுவதற்கு சற்று அனுபவம் தேவை. இரண்டு மூன்று முறுக்குகள் சுற்றினால் பழக்கமாகிவிடும். இந்த முறுக்கினை செய்து காட்டியவர் திருமதி. ஜெயந்தி அவர்கள்.

 

அரிசி மாவு - 3 கப்
உளுத்தம் மாவு - கால் கப்
உப்பு - ஒரு மேசைக்கரண்டி
டால்டா - ஒன்றரை மேசைக்கரண்டி
வெண்ணெய் - அரை கப்
சீரகம் - ஒரு மேசைக்கரண்டி
எண்ணெய் - பொரிப்பதற்கு


 

மாவினை சலித்து எடுத்துக் கொள்ளவும். டால்டா, வெண்ணைய்யை லேசான சூட்டில் சற்று உருக்கி எடுத்து வைக்கவும்.
அரிசி மாவுடன் உளுத்தம் மாவு, உப்பு, டால்டா, வெண்ணெய், சீரகம் எல்லாம் சேர்த்து போட்டு 2 கப் தண்ணீரை கொஞ்சம் கொஞ்சமாக ஊற்றி பிசைந்துக் கொள்ளவும். மிகவும் தோய்வாக இல்லாமல் பிசையவும்.
ஒரு உருண்டை மாவை எடுத்துக் கொண்டு, கட்டை விரல், ஆள்காட்டி விரல் மற்றும் நடுவிரல் ஆகிய மூன்று விரல்களைக் கொண்டு முறுக்கினை சுற்றவும். ஒரு தினசரி பேப்பரில் சுற்றினால் போதுமானது. எடுப்பதற்கு எளிதாக இருக்கும்.
கட்டை விரலாலும், ஆட்காட்டி விரலாலும் மாவினை சிறிது அழுத்திவிட்டு, பிறகு அதனைத் திருகி திருகி, வட்ட வடிவில் சுற்றவும். முறுக்கு சுற்றுவதற்கு சற்று அனுபவம் தேவை. முதல் முறையே சரியாக வந்துவிடாது. சிறிது பழகினால் போதுமானது. இந்த வகை முறுக்கினை மிகவும் மெல்லியதாக சுற்றக்கூடாது.
தேவையான அளவிற்கு சுற்றுக்களின் எண்ணிக்கையை கூடவோ, குறைத்தோ முறுக்கினைச் சுற்றிக் கொள்ளவும். முறுக்கு சுற்றின பிறகு சிறிது நேரம் உலர வைக்கவும்.
முதலில் ஒரு பேப்பரில் சுற்றிக் கொள்ளவும். முறுக்கு பெரிதாக இருந்தால், பேப்பரை அப்படியே ஒரு தட்டில் கவிழ்த்து, தட்டில் முறுக்கை மட்டும் எடுத்துக் கொள்ளவும்.
வாணலியில் எண்ணெய் ஊற்றி, காய்ந்ததும் முறுக்கு வைத்துள்ள தட்டை எண்ணெய்க்கு அருகில் கொண்டு சென்று, சற்று கவனமுடன் எண்ணெய்யில் போடவும். ஈரத்தினால் எண்ணெய் தெறிக்கும் வாய்ப்பு உள்ளது.
சிறிய வடிவ முறுக்குகள் என்றால், கைகளில் எடுத்து எண்ணெய்யில் போட்டுப் பொரித்து எடுக்கலாம்.
முறுக்கை போட்டு மஞ்சள் நிறமாக வெந்ததும் திருப்பி போட்டு வேக வைத்து எடுக்கவும்.
எண்ணெய் நுரைத்து வருவது குறைந்தவுடன், இரண்டு புறமும் பொன்னிறமாக வெந்ததும், ஒரு கம்பி கொண்டு முறுக்கினை எடுத்து எண்ணெய் வடியவிடவும்.
சுவையான கை சுற்று முறுக்கு தயார். ஒன்றிரண்டு முறை செய்து பழகினால், முறுக்கு சுற்றுவது எளிதாக வரும்.


உறுப்பினரது அண்மைக் குறிப்புகள்

இணையான குறிப்புகள்


Comments

முறுக்கு சுற்ற அனுபவம் தேவை என்றால் எப்படி செய்ய முடியும். தெளிவாக இதை சுற்றுவது பற்றி இன்னும் விளக்கவும்.

மூன்று படங்கள் போட்டு, எப்படி கையில் மாவினை எடுத்து, பிடித்து, எப்படி சுற்ற வேண்டும் என்பதை போட்டிருந்தும், இதைவிட தெளிவாக விளக்கச்சொன்னீர்கள் என்றால் எப்படி விளக்குவது என்று தெரியவில்லை.

அனுபவம் தேவை என்பதற்கு அர்த்தம், நீங்கள் முதல் முறை சுற்றும்போதே எளிதாக, வேகமாக சுற்ற வராது.. பழக்கத்தில்தான் வரும் என்பதே. எல்லாவற்றிற்கும் ஆரம்பம் என்று ஒன்று இருக்கிறது. இங்கே படத்தில் அழகாக முறுக்கு சுற்றியிருப்பவரும், ஒரு நாள் முதன்முதலாக முறுக்கு சுற்றியிருப்பார். அன்று அவருக்கும் சரியாக வந்திருக்காது. இதைத்தான் சுருக்கமாக அங்கே சொல்லியிருக்கின்றோம்.

வித்யா ராஜ்

ஜெயந்தி அவர்களுக்கு என்னுடைய வணக்கம்!

உங்கள் குறிப்பை பார்த்ததும் எனக்கு என் பாட்டியின் ஞாபாகம் வந்து விட்டது.

உளுத்தம் மாவை எப்படி தயார் செய்ய வேன்டும் என்ற குறிப்பை கொடுக்கவும். உளுந்தை வேக வைத்து/ஊர வைத்து அரைக்க வேண்டுமா அல்லது வருத்து அரைக்க வேண்டுமா என்று கூறவும்.

நன்றி

வித்யா ராஜ்

banusrinath சுவையான முருக்கு நன்ராக இருந்தது

banusrinath

super