நான் தங்களுக்கு மின்னஞ்சலில் ஏற்கனவே இதற்கு பதில் அனுப்பியிருந்தேன். மீண்டும் ஒருமுறை இங்கே குறிப்பிடுகின்றேன். இந்த ரசகுல்லாக்கள் என் கண் முன்னால் செய்யப்பட்டவை. அவற்றை படங்கள் எடுத்ததும் நான்தான். இந்த ரசகுல்லாக்கள் மிகவும் மிருதுவாகத்தான் இருந்தது. எனவே செய்முறையில் வேறு எதுவும் ரகசியம் இருப்பதாக தெரியவில்லை. சில விசயங்களை மிகவும் முக்கியமானதாக அந்த ஸ்வீட் மாஸ்டர் தெரிவித்தார். அதனை இன்னும் சற்று விளக்கமாக இங்கே குறிப்பிடுகின்றேன். ஒருவேளை உங்களுக்கு உதவியாய் இருக்கலாம்.

பாலில் இருந்து பனீரை பிரித்தெடுக்கும் போது அதிகப் புளிப்புதன்மை கொண்ட திரவம் சேர்க்கக் கூடாது. இதனால்தான் வினிகரை அப்படியே சேர்க்காமல் பாதிக்கு பாதி நீர் என்ற அளவில் சேர்த்து, பாலில் ஊற்றி திரியவிடவும். இதனை அவர்கள் செய்முறைக்காக குறிப்பிட்டாலும் அவர்கள் இப்படி செய்யவில்லை. அவர்கள் செய்யும் போது, ஏற்கனவே பாலை திரித்தபின்பு அதில் இருந்து பிரித்து எடுக்கப்பட்ட புளித்த நீரை தனியே எடுத்து வைத்திருந்தனர். அதைப் பயன்படுத்தி மீண்டும் பாலில் ஊற்றி திரித்தனர்.

எனவே முதல் முறைக்கு வினிகரை தண்ணீருடன் கலந்து ஊற்றி செய்யவும். அடுத்தடுத்த முறைக்கு ஏற்கனவே பனீரை பிரித்தெடுத்த பிறகு கிடைக்கும் நீரை தனியே எடுத்து வைத்துக் கொள்ளவும். அதாவது மேலே இரண்டாவது படத்தில் உள்ளவாறு பால் திரிந்து வரும்போது, அதில் பிரிந்து இருக்கும் நீரை மட்டும் இரண்டு மூன்று கோப்பை அளவிற்கு தனியே பிரித்து எடுத்து வைக்கவும். இந்த முறையில் பிரித்து எடுக்கப்படும் பனீர், நாம் சாதாரணமாக தயாரிக்கும் பனீர் போன்று அழுத்தமாக இருக்காது. பஞ்சு பஞ்சாக வரும்.

இந்தப் பனீரை நீங்கள் குறிப்பிட்டு இருந்ததுபோல் நீண்ட நேரம் பிசையவில்லை. அதனுடன் சிறிது சோள மாவு சேர்த்து, ஒரு நிமிடத்திற்கும் குறைவான நேரம்தான் பிசைந்தார்கள். பின்னர் வண்ணம் சேர்த்து முழுவதும் படரும் வரை சிறிது நேரம் பிசைந்தார்கள். அவ்வளவுதான். அதன்பிறகு உருட்டிவிடவேண்டும்.

உங்களுக்கு கடினமாக வருவதற்கு காரணம், பால் பவுடரும் அதில் இருந்து நீங்கள் பனீரை பிரித்தெடுக்கும் விதமும் என்று எண்ணுகின்றேன். பால் பவுடரில் இருந்து பிரித்தெடுக்கப்படும் பனீர் எந்த அளவிற்கு மிருதுவாக கிடைக்கும் என்றுத் தெரியவில்லை.

அடுத்ததாக எட்டாவது படத்தை பார்க்கவும். இந்த இடத்தில் சீனிப்பாகில் சிறிது மைதா கலந்த புளித்த நீரை (ஏற்கனவே தனியே எடுத்து வைத்திருந்ததை) தெளித்து நுரைக்கச் செய்தார்கள். ஒரு கையளவு நீரை அள்ளித் தெளித்தவுடன் அப்படியே நுரைத்துக் கொண்டு வர ஆரம்பித்தது. அந்த நுரைத்த பாகில் ரசகுல்லா உருண்டைகளைப் போட்டு நன்கு வேக வைத்தனர். மைதா நீரை தெளிப்பதற்கான காரணம் கேட்டபோது, அப்படி நுரைத்துக் கொண்டிருக்கும்போது வேகவைத்தால்தான் நல்ல மிருதுவாக கிடைக்கும் என்ற பதில் வந்தது.

அதன் பின்பு பத்தாவது படத்தில் உள்ளதுபோல், ரசகுல்லாக்கள் வெந்தவுடன் வாணலியை கீழே இறக்கி அந்த சூட்டிலேயே பாகை அள்ளி அள்ளி ரசகுல்லாக்கள் மீது ஊற்றியபடி இருந்தனர். அப்படி செய்வதன்மூலம் இன்னும் மிருதுவாகும் என்றனர்.

இதனைத் தவிர செய்முறையில் வேறு ரகசியம் எதுவும் இருக்கவில்லை. மீண்டும் ஒருமுறை முயன்று பாருங்கள். பால் பவுடருக்கு பதிலாக கறந்த பால் கிடைக்குமா என்று முயற்சித்துப் பாருங்கள்.

thankyou mr.babu for explaning in a elaborate way.i tried for 250gm paneer.it came out far better than the previous ones.thanks a lot.

அன்புள்ள அண்ணாவிர்க்கு ரசகுல்லா செய்து பார்த்தேன் நன்றாக இருந்தது பிள்ளைகளுக்கும் பிடித்துள்ளது

very nice. keep it up.