முருங்கைக்காய் பொரித்த குழம்பு

தேதி: July 12, 2008

பரிமாறும் அளவு:

ஆயத்த நேரம்: 10 நிமிடங்கள்

சமைக்கும் நேரம்: 30 நிமிடங்கள்

மொத்த நேரம்: 40 நிமிடங்கள்

2
Average: 2 (1 vote)

இந்த முருங்கைக்காய் பொரித்த குழம்பை செய்து காட்டியவர், இலங்கைத் தமிழரான <b> திருமதி. நர்மதா </b> அவர்கள். இவர் இலங்கை சமையல் மட்டுமன்றி, மெக்ஸிகன், இத்தாலியன் என்று பல்வேறு நாட்டு உணவு வகைகளையும் தயாரிப்பதில் திறன் மிக்கவர். கைவினைப் பொருட்கள் செய்வதிலும் திறன் வாய்ந்தவர். தெளிவான படங்களுடன் கூடிய இவரது குறிப்புகள் மிகவும் எளிதாகவும் இருக்கும்.

 

முருங்கைக்காய் - 2
நறுக்கின வெங்காயம் - 4 மேசைக்கரண்டி
நறுக்கின பூண்டு - 4 மேசைக்கரண்டி
புளி - சிறிய பாக்களவு
உப்பு - தேவையான அளவு
பெரிய சீரகம் (சோம்பு) - ஒரு தேக்கரண்டி
கடுகு - ஒரு தேக்கரண்டி
வெந்தயம் - அரை தேக்கரண்டி
எண்ணெய் - பொரிப்பதற்கு
கறித்தூள் - 1 1/2 மேசைக்கரண்டி
கறிவேப்பிலை - ஒரு கொத்து


 

முருங்கைக்காயை விரல் நீள அளவு துண்டுகளாக வெட்டி இரண்டாக நறுக்கிக் கொள்ளவும். பூண்டு, வெங்காயம் இரண்டையும் நீளவாக்கில் நறுக்கி வைத்துக் கொள்ளவும். புளியை ஒரு பாத்திரத்தில் போட்டு தேவையான அளவு தண்ணீர் சேர்த்து கரைத்து வைத்துக் கொள்ளவும். மற்ற தேவையான பொருட்களை தயாராக எடுத்துக் கொள்ளவும்.
வாணலியில் எண்ணெய் ஊற்றி காய்ந்ததும் நறுக்கி வைத்திருக்கும் முருங்கைக்காய் துண்டுகளை போடவும்.
முருங்கைக்காயை நன்கு சிவக்க விட்டு பொன்முறுவலாக பொரித்து எடுத்துக் கொள்ளவும்.
மற்றொரு வாணலியில் 2 மேசைக்கரண்டி எண்ணெய் ஊற்றி காய்ந்ததும் நறுக்கின வெங்காயம், பூண்டு, கடுகு, சோம்பு, வெந்தயம், கறிவேப்பிலை போட்டு வதக்கவும்.
வெங்காயம் நன்கு வதங்கியதும் பொரித்து வைத்திருக்கும் முருங்கைக்காய் துண்டுகளை போட்டு 2 நிமிடம் வதக்கவும்.
பிறகு அதில் கரைத்து வைத்திருக்கும் புளிக்கரைசலை ஊற்றி அதனுடன் அரை கப் தண்ணீர் ஊற்றி கறித்தூள், உப்பு போட்டு கிளறி விடவும்.
இந்த கலவையை நன்கு கிளறி விட்டு மூடி வைத்து கொதிக்க விடவும். குழம்பு கொதித்து சற்று கெட்டியான பதம் வந்து எண்ணெய் பிரியும் நேரம் இறக்கி வைத்து விடவும்.
சுவையான முருங்கைக்காய் பொரித்த குழம்பு தயார். இதை சாதம், இடியாப்பம், புட்டு என அனைத்து உணவுகளுடனும் பக்க உணவாக சாப்பிடலாம்.

இலங்கையில் தண்ணீருக்கு பதிலாக இதில் தேங்காய் பாலை சேர்த்து சமைப்பார்கள். சுவை மிகவும் அருமையாக இருக்கும்.


உறுப்பினரது அண்மைக் குறிப்புகள்

இணையான குறிப்புகள்


Comments

GOD IS TOO GOOD,I DID THIS GRAVY.ITS GOOD PA

GOD IS TOO GOOD

நர்மதா, இந்த குழம்பை செய்தேன். கிட்டத்தட்ட என் அம்மா செய்வது போல் உள்ளது. நாங்கள் காயை பொரிக்க மாட்டோம். தக்காளி சேர்ப்போம். மிளகாய்தூள், தனியா தூள் சேர்ப்போம்.

நான் காயை அவனில் ப்ராய்ல் செய்தேன்:) கறித்தூளுக்கு உங்கள் குறிப்பை பார்த்து அதிலுள்ள பொருட்களை ஏதோ குத்து மதிப்பாக போட்டேன்:) சுவை நன்றாகவே இருந்தது. செய்வதற்கும் எளிதாக உள்ளது. நன்றி உங்களுக்கு.