வற்றல், வடாம், அப்பளம் போன்ற பொரித்து எடுக்கப்படும் பக்க உணவுகள் இங்கே தொகுத்துக் கொடுக்கப்பட்டுள்ளன. இவை எல்லா வயதினருக்கும் பிடித்தமானவை. இவற்றை உணவுடன் சேர்த்து சாப்பிடுவதை விட தனியே சாப்பிடத்தான் பலரும் விரும்புவர். அப்பளம் போன்றவை பாயசத்துடன் சேர்த்து சாப்பிட அலாதிச் சுவையாய் இருக்கும்.

வெயில் காலம் வந்துவிட்டாலே அனைத்து வீட்டு மொட்டை மாடிகளிலும் துணி பரப்பி வற்றல் காய வைக்கப்பட்டிருப்பதைப் பார்க்கலாம். வற்றல், வடவம், அப்பளம் அனைத்தும் உடனே ஒரே நாளில் செய்து பயன்படுத்தும் பதார்த்தங்கள் அல்ல. நன்கு காய வேண்டும். இதனை தயாரிப்பதற்கு மழைக்காலங்கள் பொருத்தமானவை அல்ல. சரியாகக் காயாவிடில் சுவை குன்றுவதுடன், நன்றாகப் பொரிபடாமல் போய்விடும். ஈரப்பதத்துடன் இருந்தால் நீண்ட நாட்களுக்கு பாதுகாக்க இயலாது.