சிக்கன் ஷவர்மா

இதற்கு ஸ்பெஷலாக ரொட்டி செய்ய வேண்டிய அவசியம் இல்லை. நாம் சாதாரணமாக மைதாவுடன் சூடான நீர் விட்டு பிசைந்து செய்யும் ரொட்டியையே சற்று பெரிதாக செய்தால் போதுமானது. அப்படியே அரபு நாடுகளில் கிடைப்பது போல் செய்ய விரும்பினால் குபூஸ் பயன்படுத்தலாம். பொதுவாக இதில் அளவு என்பது ஏதும் கிடையாது. நம் விருப்பம், நம் சுவைக்கு ஏற்றபடி எல்லாம் கூடவோ குறையவோ வைக்கலாம்.

கூடவே இதில் விரல் அளவு Pickled Vegetables தான் பயன்படுத்துவார்கள். அது வினிகரில் போடப்படும் ஊறுகாய் வகை. அந்த புளிப்பும், உப்பும் கிடைப்பதற்காக தான் நான் எலுமிச்சை / வினிகரில் உப்பு கலந்து 2 மணி நேரம் ஊற வைக்க சொல்லி இருக்கிறேன். நீங்கள் விரும்பினால் கடைகளில் ரெடிமேடாக கிடைக்கும் இது போன்ற காய்கறி ஊறுகாய் வாங்கி பயன்படுத்தலாம். வீட்டிலேயும் சுலபமாக போடலாம். சிலர் இதில் சாலட் இலைகள் கூட வைப்பார்கள்.

எலும்பில்லாத கறி நல்லது. நான் குறைவாக செய்ததால் எலும்போடு க்ரில் செய்த கறியிலிருந்து எலும்பை நீக்கி இருக்கிறேன். இதே போல் மட்டன் ஷவர்மாவும் செய்யலாம். வெஜிடேரியனாக செய்ய ஃபளாஃபில் (Falafel) செய்து வைக்கலாம் கறிக்கு பதிலாக. இதே போல் ரொட்டி இல்லாமல் உள்ளே வைக்கும் கலவை எல்லாம் அப்படியே தயாரித்து ஒன்றாக கலந்து ப்ரெட் நடுவே வைத்து ஷவர்மா சாண்ட்விச்சும் செய்யலாம். இவையும் சுவையாக இருக்கும். அரேபியர்கள் சுமக் (Sumac) என்ற ஒரு வகை ஸ்பைஸ் மிக சிறிய அளவில் பயன்படுத்துவார்கள். சில நாடுகளில் இதில் Oregano, Parsley பயன்படுத்துவார்கள்.

இது அப்படியே ஒரிஜினல் ஷவர்மா ரெசிபி இல்லை. சிரியாவில் இருந்த போது அவர்கள் எல்லாவற்றையும் தனி தனி கப்பில் வைத்து நாம் கேட்ட பின் தான் கலந்து செய்து கொடுப்பார்கள். அதை தினமும் மாலை நேரத்தில் சாப்பிடும் வழக்கம் எனக்கு உண்டு. அப்படி அவர்கள் செய்வதை பார்த்து கற்றுக்கொண்டதையே கொடுத்திருக்கிறேன். சிக்கன் ஊற வைக்க, தயிர் கலவை எல்லாம் என்ன சேர்க்கிறார்கள் என்பது எனக்கு சரியாக தெரியாது. தெரிந்தவரையில் சுவைக்கு ஏற்றபடி சேர்த்து நான் செய்வதை இங்கே சொல்லி இருக்கிறேன். ஏனெனில் ஷவர்மா என்பது இது போன்ற மிடில் ஈஸ்ட் நாடுகளில் பிரபலம் என்றாலும், நாட்டுக்கு நாடு ஊருக்கு ஊரே இவை செய்யும் விதம் மாறுபடும். ஜார்டனில் கிடைக்கும் ஷவர்மாவுக்கும், சிரியாவில் கிடைக்கும் ஷவர்மாவுக்குமே ஏக வித்தியாசம் சொல்லலாம்.

குபூஸ் செய்ய: <a href="/tamil/node/6215"> குபூஸ் </a>

ஷவர்மா ரொட்டி செய்ய: <a href="/tamil/node/24488"> ஷவர்மா ரொட்டி </a>