மறந்துவிட்டீர்களா மாமனிதர்களை?

காலங்கள் அந்த நாட்களை
புரட்டிப்போட்டாலும்
கறைகள் இன்னும் படிந்தேயிருக்கின்றன.

"வீரம் என்பது பயமில்லாதபடி
நடிப்பது "என்பதில் எனக்கு
நம்பிக்கையில்லை
இல்லையென்றால் லெனினின்
புரட்சி பற்றிய
புத்தகத்தை மரணத் தருவாயிலும்
பகத்சிங்
படித்துக் கொண்டிருந்திருப்பானா?

மயிருக்குச் சமமாய் உயிரை மதித்து
மரித்திருப்பானா அந்த கொடிகாத்த குமரன்?

அக்னி கவிதைகளால்
ஆங்கிலேயர்களுக்கு சூடு வைத்திருப்பானா
பாரதக்கவி பாரதி?

இல்லையெனில்
ஆங்கிலேயர்களுக்கு
திப்புசுல்தானின் இராணுவப்படை
ஆப்பு வைத்திருக்குமா?

சுதந்திரம் என்பது
அரசு விழாக்களும் பள்ளிகளின்
அவசர ஒத்திகை நாடகங்கள் மட்டுந்தானா?

இந்தவிழாவுக்கு எத்தனை
தலைகளை காவுகொடுத்தோம் என்பதில்
கவனமின்றி இருக்கிறோமா?

தேசியக் கொடியின்
சிவப்பு வண்ணம் நமதுவேங்கைகள்
சிந்திய இரத்த்ததின்
கறை என்பதில்
கவனம் இருக்கட்டும்

காந்தியின் ஆத்மா இன்னும்
சாந்தியடையவில்லை என்றே
நினைக்கிறேன்
நடுஇரவில் பெண்கள்தனியாக
நடந்துபோகலாம் என
இன்று வரை தகவலேதுமில்லை

காலங்கள் அந்த நாட்களை
புரட்டிப்போட்டாலும்
கறைகள் இன்னும் படிந்தேயிருக்கின்றன.

எனவே சுதந்திரம் பெற்றுவிட்டோம் என்பதை அரசு விழாக்களும்,சில நாடகங்களும் பட்டிமன்றமும் மட்டும் சொல்லக் கூடாது...
ஒவ்வொரு இந்தியனின் சொல்லிலும்,செயல்களிலும் அது வெளிப்படவேண்டும்! ஜெய் ஹிந்த்!
அறுசுவையின் அனைத்து சகோதர,சகோதரிகளுக்கும் என் மனமார்ந்த சுதந்திரதின நல்வாழ்துக்கள்!