வழங்கியவர்:

தேதி: February 14, 2015

பரிமாறும் அளவு:

ஆயத்த நேரம்: 10 நிமிடங்கள்

சமைக்கும் நேரம்: 30 நிமிடங்கள்

மொத்த நேரம்: 40 நிமிடங்கள்

ரைஸ் சேவை - 200 கிராம்
புளி - ஒரு எலுமிச்சை அளவு
வெல்லம் - ஒரு தேக்கரண்டி
எள் - ஒன்றரை தேக்கரண்டி
வேர்க்கடலை - ஒரு கைப்பிடி
மஞ்சள் தூள் - சிறிது
உப்பு - சுவைக்கு
தாளிக்க:
நல்லெண்ணெய் - 2 மேசைக்கரண்டி
கடுகு - அரை தேக்கரண்டி
உளுந்து - அரை தேக்கரண்டி
கடலைப்பருப்பு - அரை தேக்கரண்டி
கறிவேப்பிலை - 2 கொத்து
மிளகாய் வற்றல் - 4
பெருங்காயம் - சிறிது

புளியை அரை கப் நீரில் ஊற வைத்து கரைத்து வடிகட்டி வைக்கவும். சேவையை வேக வைத்து தயாராக வைக்கவும். வேர்க்கடலையை வறுத்து தோல் நீக்கி இரண்டாக உடைத்து வைக்கவும். எள் சடசடவென பொரிய வறுத்து வைக்கவும்.

பாத்திரத்தில் எண்ணெய் விட்டு காய்ந்ததும் கடுகு தாளித்து உளுந்து, கடலைப்பருப்பு, மிளகாய் வற்றல் சேர்த்து சிவக்க விடவும். இதில் கறிவேப்பிலை, பெருங்காயம் சேர்த்து வதக்கவும்.

வதக்கியவற்றுடன் கரைத்து வைத்த புளித் தண்ணீர், மஞ்சள் தூள், உப்பு சேர்த்து கொதிக்க விடவும்.

கலவை புளி வாசம் போக நன்றாக கொதித்ததும், வெல்லம் சேர்த்து கலந்து விடவும். அதில் சமைத்து வைத்த சேவை, வறுத்த வேர்க்கடலை மற்றும் எள் சேர்த்து கலந்து விடவும்.

ஒன்று போல பிரட்டி விட்டு (சேவை உடையாமல்) 2, 3 நிமிடங்கள் மிதமான தீயில் வைத்து எடுக்கவும்.

சுவையான புளி சேவை தயார். அப்பளம், வற்றல் அல்லது உருளை வறுவலுடன் பரிமாறலாம்.

ரெடிமேட் ரைஸ் சேவை வாங்கினால் கவரில் சொல்லி இருக்கும் முறையில் சமைத்து வைக்கவும். நான் பயன்படுத்திய சேவையில் செய்முறை : கொதி நீரில் மூழ்க 3, 4 நிமிடம் மூடி வைத்திருந்து நீரை வடிகட்டி விட வேண்டும். உப்பு சேர்க்க தேவை இல்லை. அதனால் புளி நீரில் உப்பு சேர்த்திருக்கிறேன். சேவை சமைக்கும் போது உப்பு சேர்க்க சொல்லி இருந்தால் புளி நீரில் சிட்டிகை உப்பு சேர்த்தால் போதுமானது.

ரெடிமேட் ரைஸ் சேவைக்கு பதிலாக இடியாப்பமும் பயன்படுத்தலாம். இடியாப்பம் பயன்படுத்தினால் கைகளால் உடையாமல் உதிரியாக எடுத்து வைத்துக் கொண்டு பயன்படுத்தவும்.

விரும்பினால் கோவில் புளியோதரையில் சேர்ப்பது போல பருப்பு, கடலை, எள் எல்லாம் வறுத்து பொடி செய்து தூவி கிளறலாம். வெல்லம் சேர்க்க விரும்பாவிட்டால் சேர்க்க வேண்டாம்.