மலர்ச் செண்டு

வழங்கியவர்: seba

தேதி: December 15, 2015

இரண்டு நிறத்தில் பூக்கள் (கமீலியா, டேலியா அல்லது ரோஜா)
பெரிய‌ அகலமான‌ இலைகள்
பன்ன‌ இலைகள்
ஸ்னிப்பர்
கத்தரிக்கோல்
செலோஃபேன் பேப்பர்
ஃப்ளோரல் பேப்பர்
ஸ்டேப்ளர்
ரிப்பன்
ராஃபியா அல்லது சணல்
செலோடேப்

மேற்ச்சொன்ன தேவையானவைகள் அனைத்தையும் தயாராக எடுத்து வைக்கவும்.

இலைகளை ஈரத் துணியால் துடைத்துவிட்டு, வளைத்துப் பிடித்து காட்டியுள்ளபடி ஸ்டேப்பிள் செய்யவும்.

படத்தில் உள்ளபடி வெட்டிவிடவும். மூன்று அல்லது நான்கு இலைகளை இப்படித் தயார் செய்து வைக்கவும்.

நடுவில் வைக்க‌ விரும்பும் நிறப் பூக்களைத் தெரிந்து, அவற்றிலுள்ள‌ இலைகளைக் கிள்ளிவிடவும்.

சுற்றிலும் வைக்கத் தெரிந்தெடுத்துள்ள‌ பூக்களில் இடையிடையே ஒன்றிரண்டு இலைகளை மட்டும் விட்டுவிட்டு மீதி இலைகளை நீக்கிவிடவும். முதலில் எடுத்த‌ பூக்களைச் சுற்றிலும் வைத்துப் பிடித்து, ராஃபியாவால் காம்புகளை நன்கு இறுகச் சுற்றிக் கட்டவும்.

வளைத்து வைத்த‌ இலைகளில் மூன்று அல்லது ஐந்து இலைகளை, கட்டிய‌ செண்டின் பின்பக்கமாக வைத்து மீண்டும் கட்டிக் கொள்ளவும்.

பன்ன‌ நெட்டுக்களை தேவையான‌ நீளத்திற்கு முறித்துக் கொள்ளவும். அவற்றின் அடியில் உள்ள‌ இலைகளை உதிர்த்துவிட்டு இவற்றை வளைந்த‌ இலைகளுக்கு இடையிலும் வெளி ஓரங்களிலும் வைத்துக் கட்டவும். முன்புறம் மேலும் இரண்டு மூன்று பூக்களைச் சற்று இறக்கினாற் போல‌ வைத்துக் கட்டவும்.

செலோஃபேன் கடதாசியைப் பெரிய‌ சதுரமாக‌ வெட்டிக் கொண்டு முக்கோணமாக‌ மடித்துக் கொள்ளவும். முக்கோணத்தின் நடுவில் உள்ள‌ கூரான‌ பகுதியைச் செண்டின் பின் பக்கம் மேலே தெரியுமாறு வைத்து, ஓரங்களைச் சற்றுச் சுருக்கிப் பிடித்து செலோடேப் போடவும். (இப்படியே தண்டுப் பகுதியை நீருள்ள கிண்ணம் ஒன்றில் வைத்துவிட்டால் பிறகு தேவையான பொழுது எடுத்துத் துடைத்துவிட்டு மீ்தி வேலையைத் தொடரலாம்).

ஃப்ளோரல் பேப்பரையும் பெரிய‌ சதுரமாக‌ வெட்டி எடுக்கவும். பூக்களின் காம்புகளை ஒரே நீளத்தில் வைத்து நறுக்கிக் கொள்ளவும். மீதியாக‌ உள்ள‌ ஃப்ளோரல் பேப்பரில் ஒரு நீளத் துண்டு வெட்டிக் கொண்டு, செண்டின் தண்டுப் பகுதியை மறைத்துச் சுற்றிக் கொண்டு செலோடேப் போட்டு ஒட்டவும். (தண்டுகளை ஈரமான டிஷ்யூவினால் சுற்றி விட்டு, அதன் மேல் செலோஃபேன் சுற்றிவிட்டு பிறகு ஃப்ளோரல் பேப்பரைச் சுற்றினால் பூக்கள் சற்று அதிக நேரம் வாடாமலிருக்கும்.)

சதுர‌ ஃப்ளோரல் பேப்பரை முன்பு செலோஃபேன் பேப்பருக்குச் செய்தது போல‌ முக்கோணமாக‌ மடித்து செலோஃபேன் பேப்பரின் பின்னால் வைத்து அதே விதமாக‌ டேப் செய்துவிடவும்.